Goierriko Hitza

Karma Quinteten eskutik jazz kontzertua izango da bihar

Idiazabal Kontzertua Txomenareneko parkean izango da 20:00etan; jazz kanta ezagunak eta beraienak joko dituzte.

e. imaz

Beste Musikak ekimenaren barruan, bihar iluntzeko zortzietan hasita, Karma Quintet taldeak kontzertua eskainiko du Txomenareneko parkean.

Karma Quintet jazz bokaleko talde bat da, eta bertan, pop musikaren eta brasildar sustraiak dituen musikaren eraginak elkartzen dira.

Enrique Galan eta Eusebio Soriaren arteko lankidetza artistikotik abiatuta sortu zen taldea. Elkarrekin lanean hainbat urte egin ondoren, 2007. urtean Bea Hurtado, Igor Intxausti eta Ixak Oiartzabal elkartu zitzaizkien eta horrela taldea gaur egun ezagutzen den bezala osatu zuten.

Jazzaren errepertorioaren barruan ezagunak diren lanak jotzen dituzte, baita beraien kantak ere. Azken horiek Karma Quintet jazz taldeak une jakin bakoitzean izan dituen kezka musikalen ondorio dira.