Goierriko Hitza

2008-04-26 | 11:31:26

Bi kamioik istripua izan dute Idiazabalen

Ez da zauriturik izan

Gaur goizeko 09:10a inguruan bi kamioik istripua izan dute Idiazabalgo udal barrutian. N-1 errepidean, Gasteizerako norantzan. Etxegarateko gainera iristeko gutxiren faltan, elkar jo dute bi ibilgailu astunek. Zauriturik ez da izan. Bi trailerretako batek arazorik gabe jarraitu ahal izan du martxan, eta bestea garabiarekin erretiratu dute 11:00ak inguruan. Ertzaintzako iturrien arabera ez da trafiko erretentzio handirik sortu, une oro errei bat irekita egon delako.

Ez du erantzunik

2008-04-23 | 18:23:15

IX. Mami Txapelketa antolatu dute maiatzaren 2rako

Idiazabaldar guztiei dago irekita txapelketa eta parte hartu nahi duenak azken eguna du izena emateko

Maiatzaren 4an Gazta Eguna ospatuko dute Idiazabalen eta horren harira ohikoa den bezala mami txapelketa antolatu dute. Aurtengoa egiten duten 9. aldia da. Txapelketa idiazabaldar guztiei dago irekita. Mamia egiteko erabilitako esneak ardi latxarena izan beharko du eta azukre edo beste gehigarririk ez da onartuko. Bakoitzak bere etxean egingo du mamia bi ontzitan eta maiatzak 2an, ostiralean, arratsaldeko seietarako Jubilatuen Elkartera eraman beharko du. Esnea eta gatzagia partehartzailearen kontura izango dira. Bestalde ontziak udaletxean jasoko dira doan, izena emateko garaian. Mamien dastaketa Jubilatuen Elkartean egingo dute epaimahaiko kideek eta euren iritzia onartu beharko dute parte hartzaileek. Mami txapelketara aurkeztu nahi duenak maiatzaren 25erako,ostiralerako izena eman beharko du.

Ez du erantzunik

2008-04-17 | 12:27:38

N-1 errepidea erabat itxita geratu da Etxegaraten

Bi noranzkoetako trafikoa geldituta egon da eguerditik aurrera, kamioi batek istripua izan ondorenetik

Bi kamioik oso antzeko istripuak izan dituzte gaur eguerdian Etxegaraten, ordubeteko tartea eta bata bestetik oso gertu. Zirkulazioan ondorioak, ordea, bigarren istripuak larriagoak utzi ditu lehenengoak baino. Zauriturik ez da izan. 12:00etan kamioi batek guraizearena egin du Etxegarate gainean (Idiazabal), eta N-1 errepideko zirkulazioa erabat etenda geratu da bi noranzkoetan. Aurretik, 11:00etan beste kamioi bat ere gurutzatuta geratu da kaminoan, irristatuta. Hala ere, ez du hark eragozpen larririk eragin, errei bakarra oztopatu baitu.

Ez du erantzunik

2008-03-05 | 16:01:02

Auzolanean egingo dute erreka-garbitzea larunbat honetan Idiazabalen

Agenda 21, udala, gaztetxea eta herri eskola dira ekimen hau lehen aldiz antolatzea bultzatu dutenak.

Larunbat honetan goizeko 11etan auzolanean egingo dute Idiazabalgo Urtsuaran erreka-garbitzea. San Blas ondorenetik hondakin ugari dagoela bertan pilatuta jakinarazi dute antolatzaileek eta hori dela eta, errekatik ateratako hondakinekin asteburuan, plazan bertan «erakusketa» jartzeko asmoa agertu dute, «guztiok jabetu gaitezen errekara zer botatzen dugun».

Ez du erantzunik

2008-02-02 | 20:34:36

Hotzaren gainetik, giro beroa Idiazabalgo jaietan

Txirrindulari proba eta paella erraldoia izan dituzte eguerdian

Goiz partean giroak ez zuela lagunduko bazirudien ere, festa giroa nagusitu da azkenean Idiazabalen. Goizean zehar, txirrindulari proba jendetsua egin dute, eta eguerdian, 1.200 lagunentzako paella erraldoia. Jendetza bildu da plaza inguruan. Arratsaldean, goitibehera txapelketa eta pilota partidak izan dira. Azken honetan, 22-21 nagusitu zaizkio Barriola eta Gonzalez, Begino eta Kokak osaturiko bikoteari.

Erantzun 1

2008-01-28 | 18:46:05

Kamel Ziani nagusi inoizko Herri Kros jendetsuenean

Marka guztiak hautsiz, 624 lagunek parte hartu dute proban

Idiazabalgo Herri Krosak inoizko parte-hartzerik handiena izan zuen atzo, guztira, 624 lagun atera baitziren korrika. Gizonezkoetan Kamel Ziani zen lasterketa irabazteko faboritoa, eta oriotarrak ez zuen hutsik egin. Emakumezkoetan berriz, Nerea Etxeberria azpeitiarra izan zen azkarrena. Goierritarrei dagokionean, Migel Angel Encina legazpiarra eta Naroa Arrieta lazkaotarra izan ziren onenak. Biek, goierritar onenaren Hitza saria jaso zuten.

• Sailkapenak

5 erantzun

2007-12-08 | 18:53:54

Giro ona eta partehartze handia Gaztetxearen urtemugako ekitaldietan

Konstituzioaren kontrako bertso saioa eta Tapia eta Leturiaren kontzertua izan dira ekitaldirik jendetsuenak

Idiazabalgo Gaztetxearen aldeko ekitaldietan giro ona izan da nagusi. Ostiralean, jende ugari bildu zen Konstituzioaren aurkako bertso saioan. Iker Zubeldiak, Peñagarikanok eta Sustrai Colinak saio ederra osatu zuten. Ondoren, Tapia eta Leturiak dantzan jarri zituzten herriko gazteak. Karpan jende asko bildu zen, eta festa giroa izan zen nagusi. Gaur gauean bukatuko dute Gaztetxearen aldeko festa Idiazabalen. Gazte afaria eta rock kontzertuak izango dira. 23:00etatik aurrera, Bartolo ta Kitto, Pikutara eta Txapelpunk taldeek joko dute.

3 erantzun

2007-11-24 | 10:47:17

Furgoneta bat irauli da Idiazabal parean, errepidean erregai isuria eraginez

Goizeko 07:45ean izan da ezbeharra, N-1en, eta errei bat itxi behar izan dute zorua garbitzeko

Gaur goizeko zortziak laurden gutxian furgoneta batek istripua izan du Idiazabal parean, N-1 errepidean. Bidetik irten eta irauli egin da ibilgailua. Ez da zauriturik izan, baina trafikoan eragina izan du, furgonetak galdu duen erregaia errepideko zoruan zabaldu delako. Kaltetutako kotxea erretiratu eta erregai irristakorra garbitzeko errei bat itxi behar izan dute Herri Lan brigadek, Gasteizerako norabidean.

Ez du erantzunik